Шүүгчийн захирамжийн огноо, дугаар: 2025.03.25-ны өдрийн 128/ШЗ2025/1988 Процессын тойм

Захирамжийн төлөв: Хүчин төгөлдөр болсон

   М их сургуулийн харьяа ерөнхий боловсролын ахлах сургууль нь Засгийн газрын хяналт хэрэгжүүлэх газрын ахлах хянан шалгагчийн 2025 оны 02 дугаар сарын 21-ний өдрийн ХХ дугаар албан шаардлагыг хүчингүй болгуулахаар шүүхэд ханджээ.

   Гэхдээ нэхэмжлэл гаргагч нь шүүхэд нэхэмжлэл гаргахын өмнө дээрх албан шаардлагыг урьдчилан шийдвэрлүүлэх журмаар хянуулахаар Ерөнхий хянан шалгагч буюу Засгийн газрын хяналт хэрэгжүүлэх газрын даргад хандаагүй байдаг.

   Засгийн газар дахь хяналтын тухай хуульд зааснаар Засгийн газрын хяналт хэрэгжүүлэх газрын дарга нь Ерөнхий хянан шалгагч байх ба ахлах хянан шалгагч, хянан шалгагчийг Ерөнхий хянан шалгагч томилж, чөлөөлөхөөр заасан байх тул маргаан бүхий захиргааны актыг гаргасан ахлах хянан шалгагчийн дээд шатны албан тушаалтан нь Ерөнхий хянан шалгагч буюу Засгийн газрын хяналт хэрэгжүүлэх газрын дарга байна.

   Тиймээс Захиргааны ерөнхий хуульд зааснаар тухайн актыг гаргасан ахлах хянан шалгагчийн гаргасан шийдвэрийг эс зөвшөөрсөн гомдлыг дээд шатны албан тушаалтан буюу Ерөнхий хянан шалгагч урьдчилан шийдвэрлэх ажиллагааны журмыг хэрэгжүүлэх боломжтой байгаа энэ тохиолдолд шүүх нэхэмжлэлийг ийнхүү урьдчилан шийдвэрлэх ажиллагаа хийсний дараа хүлээн авах зохицуулалттай.

   Иймд, Захиргааны хэрэг шүүхэд хянан шийдвэрлэх тухай хуульд заасны дагуу “... урьдчилан шийдвэрлүүлэх шаардлагыг биелүүлээгүй ...” үндэслэлээр нэхэмжлэлийг хүлээн авахаас татгалзаж шийдвэрлэв.

Тойм бэлтгэсэн: Нийслэл дэх Захиргааны хэргийн анхан шатны шүүхийн шүүгч Т.Мөнх-Эрдэнэ